नेपाल समूह विजेता

साफ महिला च्याम्पियनसिप फुटबलमा नेपालले बंगलादेशमाथि सहज जित हात पारेको छ र समूह एको विजेता बनेको छ । विराटनगरको शहिद रंगशालामा भएको खेलमा बंगलादेशविरुद्ध मैदान उत्रिँदा नेपाली टोलीमा आत्मविश्वाससँगै फेरि बराबरीमा रोकिनु पर्ने त होइन भन्ने डर थियो ।

पछिल्लो समय गत कात्तिकमा म्यानमारमा भएको ओलम्पिक छनोटको पहिलो राउण्डमा नेपालले बंगलादेशसँग १-१ गोलको बराबरी खेलेको थियो । तर, पहिलो हाफमा उत्कृष्ट प्रदर्शन गरेको नेपालले ३-० को सहज जित निकालेको छ । नेपालले खेलको छैटौं मिनेटमा उपहार गोलबाट अग्रता लिएको थियो । अनिता बस्नेतले प्रहार गरेको बल क्लियर गर्न खोज्दा बंगलादेशकी मसुरा पर्भिनले आफ्नै पोष्टमा गोल गरिन् ।

यसअघि सावित्रा भण्डारी वान भर्सेस् वानको स्थितिमा गोल गर्न चुकेकी थिइनन् । दर्शकको साथ पाएको नेपालले १०औं मिनेटमा अर्को गोल गर्ने अवसर खेल फाल्यो । कप्तान निरु थापा वान भर्सेस् वानमा गोल गर्न चुकिन । तर, २३औं मिनेटमा सावित्राले उत्कृष्ट गोल गर्दै नेपालको अग्रता दोब्बर बनाइन् । उनले डिफेन्डरलाई छक्याएर किपरलाई पनि बिट गर्दै गोल गरेकी थिइन् ।

पाँच मिनेटपछि साबित्राकै पासमा मञ्जलीकुमारी योञ्जनले गोल गरिन् । योसँगै नेपाल ३-० गोलको अग्रतामा रह्यो ।नेपालले दोस्रो हाफमा भने पहिलो हाफको खेल दोहोर्‍याउन सकेन । पहिलो हफमा मिडफिल्ड निकै उत्कृष्ट देखिएको थियो तर, दोस्रो हाफमा सुस्तायो भने फरवार्ड लाइनका खेलाडी पनि चल्न सकेनन् ।

खेलको ५८औं मिनेटमा सावित्राले प्रहार गरेको बल बंगलादेशकी मसुरा पर्भिनले बचाइन् । किपर रुप्ना चक्मा विट भइसकेको अवस्थाबाट पर्भिनले गोल लाइनबाट बल क्लियर गरेकी थिइन् ।६४औं मिनेटमा पर्भिन नै फेरि बाधक बनिन् । सावित्राले प्रहार गरेको बल डिबक्सभित्रबाट पर्भिनले नै क्लियर गरेकी थिइन् । बंगलादेशले दोस्रो हाफमा राम्रो भुम बनाएको थियो तर, प्रहार बारमा लागेर फर्किन पुग्यो ।अब नेपालले सेमिफाइनलमा भारत र श्रीलंकाबीचको उपविजेतासँग खेल्नेछ । भारत र श्रीलंकाबीचको खेल आइतबार हुनेछ । दुवै टोलीले सेमिफाइनलको यात्रा तय गरिसकेका छन् ।