समूह सी अन्तर्गत समूह चरणको अन्तिम खेलमा पेरुले अस्ट्रेलियाविरुद्ध शानदार प्रदर्शन गरेको छ। रुस विश्वकपको अन्तिम १६ मा प्रवेश गर्ने सम्भावना बोकेको अस्ट्रेलिया दुई खेलबाटै बाहिरिसकेको पेरुसँग २-० ले पराजित भएको हो।
अस्ट्रेलियासँगको खेलको १८ औं मिनेटमा गोल गर्दै पेरुले अग्रता लिएको थियो। पेरुका लागि १८ औं मिनेटमा आन्द्रे कारिलोले गोल गरे। पहिलो हाफ १-० मा रोकिएको अस्ट्रेलियाले दोस्रो हाफमा अर्को गोल खाएको हो।
दोस्रो हाफको पाँच मिनेटपछि अस्ट्रेलियाविरुद्ध पेरुका पावलो गुरेरोले गोल गर्दै अग्रता २-० मा पुर्याए। त्यसपछि भने पेरुले गोल गर्न सकेन। अस्ट्रेलियाले यो म्याच जितेको भए अघिल्लो चरणको सम्भावना थियो। यद्यपी उसले नराम्रो हार खाएपछि अर्को म्याचमा बराबरी खेलेका फ्रान्स विजेता र डेनमार्क उपविजेता बन्दै अन्तिम १६ मा प्रवेश गरेका छन्।
