नेपाली सङ्गीतको क्षेत्रमा विशिष्ट योगदान पुर्याउनुहुने स्रष्टाहरूलाई २०७६ सालको नातिकाजी विशिष्ट सम्मान एवं पुरस्कारहरू घोषणा गरिएको छ । नेपाली सङ्गीतका शिखर पुरुष नातिकाजी श्रेष्ठको ९६ औँ जन्म जयन्तीका अवसरमा कुटुवहाल चाबहिलमा शुक्रवार सम्मान एवं पुरस्कार घोषणा गरिएको हो । वरिष्ठ गायक योगेश वैद्यको संयोजकत्वमा गठित तीन सदस्यीय सम्मान एवं पुरस्कार छनोट समितिको सिफारिसअनुसार सम्मान एवं पुरस्कार घोषणा गरिएको समाजले जनाएको छ ।
यसै गरी, मेलिना राई, वसन्त सापकोटा, सुरज थापा र हर्क साउदलाई नातिकाजी राष्ट्रिय प्रतिभा पुरस्कार–२०७६ प्रदान गरिने जनाइएको छ । यस्तै, जीवित जल्मीलाई नातिकाजी राष्ट्रिय सङ्गीत संयोजक तथा वाद्य पुरस्कार–२०७६ प्रदान गरिने भएको छ । यसै गरी, विकास नाथ योगीलाई नातिकाजी राष्ट्रिय शास्त्रीय सङ्गीत पुरस्कार–२०७६, बद्री पंगेनीलाई नातिकाजी राष्ट्रिय लोक सङ्गीत पुरस्कार–२०७६ र पत्रकार विदुर गिरी एवं श्याम स्मृतलाई नातिकाजी राष्ट्रिय कला पत्रकारिता पुरस्कार–२०७६ प्रदान गरिने जनाइएको छ ।
कार्यक्रममा समाजका अध्यक्ष शम्भुजित बास्कोटाले नेपाली सङ्गीतको इतिहास खोज्ने हो भने नातिकाजीको अध्ययनबाट मात्र पूरा हुने बताउनुभयो । यस्तै, वरिष्ठ सङ्गीतकार शान्तिराम राईले नेपाली मौलिक सङ्गीतको राजमार्ग निर्माणमा नातिकाजीको प्रमुख भूमिका रहेको चर्चा गर्नुहुँदै नेपाली सङ्गीतका हरेक पारखीले यो सत्यलाई अनुसरण गर्नुपर्ने बताउनुभयो ।
यस्तै, गायक सुगम पोखरेलले नेपाली सङ्गीतको सागरका रूपमा नातिकाजीको योगदान रहेको चर्चा गर्नुभयो । गायक बद्री पङ्गेनीले लोक सङ्गीतको धरातलमा नातिकाजीले आफ्ना हरेक सङ्गीत सिर्जना गर्नुभएको बताउनुभयो । समाजका सचिव दीपक श्रेष्ठले स्वागत गर्नुभएको कार्यक्रममा गीतकार भूपेन्द्र खड्काले नेपाली मौलिक सङ्गीतको विकास र विस्तारमा नातिकाजीको योगदानको चर्चा गर्नुहुँदै नेपाली सङ्गीतको आकाशका रूपमा योगदान रहेको बताउनुभयो । सम्मान एवं पुरस्कार वितरण कार्यको समय पछि तय गरिने जनाइएको छ ।
